Ndryshimet ligjore të propozuara në tetë ligjet që kanë të bëjnë me mjedisin jetësor sot u miratuan në seancën e 26-të të Qeverisë së RMV-së, për të vazhduar procedurat në Kuvend, transmeton Portalb.mk.
Ministria e mjedisit jetësor dhe planifikimit hapësinor (MMJPH) sqaroi se ndryshimet përfshihen në Ligjin për cilësinë e ajrit të ambientit, Ligjin për mjedisin, Ligjin për Mbrojtjen e Natyrës, Ligjin për Ujërat, Ligjin për Kontrollin e Emetimeve të Përbërjeve Organike të Avullueshme gjatë Përdorimit të Benzinës, Ligjin për Shtigjet Malore, Ligjin për Zhurmën dhe Ligjin për Organizmat e Modifikuar Gjenetikisht.
“Për miratimin e këtyre propozimeve, është e nevojshme që Kuvendi i RMV-së të miratojë ndryshimet në Ligjin për Kundërvajtje dhe shpresoj se kjo do të bëhet sa më shpejt që të jetë e mundur, në mënyrë që këto ndryshime kryesore në fushën e menaxhimit të ajrit dhe zonave të kontaminuara dhe të fillojë zbatimi i ndryshimeve në praktikë”, tha Naser Nuredini, ministri i ekologjisë, duke vlerësuar se këto ndryshime do të përmirësojnë cilësinë e mjedisit.
Ai sqaroi se këto propozime ishin parashtruar edhe më parë në Kuvend, por nuk ishin miratuar për shkak shpërbërjes së Kuvendit.
“Në këto plotësim-ndryshime, u bë harmonizimi i Ligjit për Kundërvajtje dhe Ligjit për Inspektim, dhe parashikohet një rritje shtesë e gjobave (deri në 20 herë), në përputhje me ndryshimin e propozuar më parë në Ligjin për Kundërvajtje, i cili u paraqit në Kuvend për miratim”, sqaruan nga ministria.
Ndryshimet ligjore përcaktojnë rregullat për inspektimin e gjendjes kur tejkalohen parametrat kufitare për ndotjen e ajrit.