Edhe pse nuk ka ndonjë trajtim specifik për COVID-19, shpesh mund t’i lehtësoni simptomat vetë derisa të shëroheni. Sigurisht, nëse shqetësoheni për shëndetin tuaj, gjithmonë mund të konsultoheni me mjekun amë për këshilla shtesë, shkruan Panacea.mk.
Sipas ekspertëve, ekzistojnë tre simptoma kryesore të infeksionit me koronavirusin e ri:
- Temperatura e lartë
- Kollitja dhe
- Gulçimi.
Si të trajtoni temperaturën e lartë?
Nëse keni temperaturë të lartë, mund t’ju ndihmojë:
- Shumë pushim
- Shumë lëngje për të shmangur dehidratimin, ndërsa ju duhet të pini mjaft lëngje për ta pasur urinën të verdhë ose të pastër.
- Paracetamoli ose ibuprofeni mund t’i lehtësojnë simptomat lehtë
Si të qetësoni kollitjen?
- Nëse kolliteni, është më mirë të shmangni shtrirjen në shpinë. Shtrihuni në krah dhe mbajeni kokën më lart.
- Për të lehtësuar kollën, merrni një lugë gjelle mjaltë, por nuk duhet t’u jepet fëmijëve nën 12 muaj.
- Nëse asgjë nga këto nuk u ndihmon, kontaktoni mjekun se çfarë të bëni për të qetësuar kollën tuaj
- Mos shkoni në farmaci
Nëse ju ose dikush ka simptoma të infeksionit me koronavirus, duhet të qëndroni në shtëpi. Nëse është e nevojshme, kontaktoni mjekun ose ndonjë profesionist tjetër me telefon.
Çfarë të bëni nëse keni frymëmarrje të vështirësuar?
Nëse keni vështirësi me frymëmarrjen, mund ta ndihmoni veten nëse temperatura e ajrit në dhomë është pak më e ulët. Ulni nxehtësinë ose hapni dritaret.
Mund të provoni gjithashtu:
- Merrni frymë ngadalë përmes hundës, por nxirrni frymën përmes gojës, ndërsa mbani buzët bashkë sikur të fryni një qiri.
- Qëndroni drejt në karrige
- Relaksoni shpatullat dhe drejtohuni
- Përkuluni ngadalë, ndihmojeni veten duke mbështetur duart në gjunjë ose në diçka të qëndrueshme.
Mundohuni të mos bëni panik nëse mbeteni pa ajër, kjo vetëm mund të përkeqësojë situatën. Nëse gjendja nuk përmirësohet, telefononi menjëherë mjekun.
Mbroni veten
Larja dhe dezinfektimi i duarve janë çelësi për parandalimin e infeksionit. Duart duhet të lahen shpesh dhe tërësisht me ujë dhe sapun për të paktën 20 sekonda. Kur uji dhe sapuni nuk janë në dispozicion, përdorni dezinfektues që përmban të paktën 60% alkool. Mos teshtini në duart tuaja dhe mos teshtini në drejtim të të tjerëve.
Ndihmoni veten me frymëmarrje të duhur
Dr. Gzim Rexhepi, pulmolog shpjegon se sa e rëndësishme është të marrësh frymë siç duhet, ndërsa kjo veçanërisht i referohet përdorimit të diafragmës.
“Frymëmarrja diafragmatike, e quajtur ndryshe frymëmarrje abdominale do të thotë shkëmbim i plotë i ajrit. Ajri i thithur shkëmbehet me dioksidin e karbonit që del. Frymëmarrja e tillë ngadalëson rrahjet e zemrës, ul dhe stabilizon tensionin e gjakut. Ne e quajmë këtë frymëmarrje të duhur. Frymëmarrja si kjo është jashtëzakonisht e rëndësishme për njerëzit me mushkëri të dëmtuara (njerëzit me sëmundje pulmonare obstruktive kronike) ku ajri mund të mbetet i bllokuar në mushkëri, i cili vazhdimisht shtyp diafragmën poshtë”, shpjegon Dr. Rexhepi.