Kur të mendohet nëse duhet të ndalohet mësimdhënia me prani fizike, duhet të bëhet vlerësim i mirë i përfitimeve kundrejt rreziqeve, duke marrë parasysh shëndetin, arsimin dhe faktorët tjerë socio-ekonomikë. Ajo që dimë me siguri është se mbyllja e shkollave ka efekte të qarta negative në shëndetin, arsimin dhe zhvillimin e fëmijëve, të ardhurat e familjes dhe ekonominë e përgjithshme, tha Patricia di Xhovani, përfaqësuesja e UNICEF-it në vend.
“Ne u bëjmë thirrje që shkollat të jenë të fundit që do të mbyllen dhe të parat që do të hapen kur të krijohen kushte të sigurta për këtë. Mbyllja e shkollave duhet të merret parasysh vetëm kur nuk ka alternativa të tjera. Në një kohë kur vendi po përballet me rritje të numrit të të infektuarve me kovid-19, interesi më i mirë i fëmijëve duhet të jetë kryesori gjatë marrjes së ndonjë vendimi për atë se kur dhe si shkollat duhet të qëndrojnë të hapura”., thotë Xhovani, transmeton Meta.mk.
Siç thekson ajo, vendimi për të rihapur shkollat për nxënësit e klasës I deri të III me masat e rekomanduara parandaluese dhe mbrojtëse është një hap pozitiv drejt uljes së efekteve negative të mbylljes së zgjatur të shkollave.
Përfaqësuesja e UNICEF-it tregon shembuj në të gjithë botën që tregojnë se mbylljet e shkollave nuk janë një faktor i rëndësishëm në zvogëlimin e transmetimit të kovid-19 në komunitet, veçanërisht pasi fëmijët nën moshën dhjetë vjeç kanë një shkallë më të ulët të përhapjes së virusit se sa fëmijët e mëdhenj.