Ish-ambasadori i Maqedonisë në Poloni, Petre Nakovski dhe ish-sekretari shtetëror në MPB, Hetem Ademi kanë fituar betejën e tyre në Gjykatën Administrative të Shkupit, kundër vendimit të Komisionit të Lustrimit që i shpalli si bashkëpunëtor të shërbimeve sekrete në të kaluarën.
Avokati i tyre, Stavre Xhikov ka informuar se gjykata ka gjykuar në favor të dy klientëve të tij, duke urdhëruar që të anulohen vendimet e Komisionit të Lustrimit. Gjykata i ka vlerësuar si të vlefshme argumentet e dy qytetarëve që u shpallën si ish-spiunë, duke konfirmuar se ata nuk kanë qenë të tillë dhe nuk ka fakte se kanë bashkëpunuar me shërbimet sekrete.