Rilindja Demokratike Kombëtare themeloi degën e saj në Gazibabë të Shkupit. Me votim unanim të kuvendarëve të pranishëm, kryetar i degës Gazibabë të Shkupit u zgjodh Ismet Imeri – profesor i artit figurativ në shkollën e mesme “Zef Lush Marku”.
“Falënderoj kuvendarët për besimin e dhënë. Zgjedhja ime si kryetar paraqet një përgjegjësi të jashtëzakonshme dhe së bashku me aktivistët e tjerë do të punojmë për të mirën e e Gazibabës. Së bashku me bashkpuntorët e mi të RDK-së do të angazhohem që Gazibaba dhe banorët e saj të dalin nga kjo gjendje e palakmueshme në të cilën gjenden” theksoi kryetari i porsazgjedhur i degës së RDK-së në Gazibabë, Ismet Imeri.
Në themelimin e degës së Gazibabës ishte i pranishëm kryetari i RDK-së Rufi Osmani. Osmani theksoi se RDK në të gjitha vendbanimet ku ajo shtrihet, ka ngritje të përkrahjes dhe se në zgjedhjet e radhës do të korrë rezultat të favorshëm, rezultate këto të cilat në zgjedhjet e ardhshme parlamentare do ta bëjnë RDK-në forcë kryesore shqiptare.
“Në vigjilje të zgjedhjeve të ardhshme lokale në të gjithat degët e formuara po punohet intensivisht. Jam i bindur se me themelimin e strukturës bazë të RDK-së për komunën e Gazibabës, aktiviteti juaj do të jetë më i sistemuar dhe se rezultatet konkrete nuk do të mungojnë” tha Osmani.
RDK vazhdon me formimin e strukturave partiake edhe në komunat tjera të rajonit të Shkupit, të banuara me shqiptarë./portalb