Prej sot deri të dielën ora policore prej në 14 deri në 5
Prej ditës së sotme deri në ditën e diel, qytetarëve të Maqedonisë së Veriut do t’u lejohet lëvizja prej orës 05:00 deri në ora 14:00. Ndalesa për lëvizje në tërë shtetin do të fillojë në ora 14:00 dhe do të zgjatë deri më 05:00, njofton Portalb.mk.
Për personat mbi 67-vjeç ndalesa, sot, nesër dhe pasnesër do të lejohet lëvizja prej orës 05:00 deri më 11:00.
Të gjithë të rinjtë deri më 18-vjeç, sot, nesër dhe pasnesër do të mund të lëvizin prej orës 12:00 deri në ora 14:00.
Prej të hënës do të kthehet orari i vjetër i orës policore, gjegjësisht ndalesa për lëvizje do të jetë prej orës 19 deri në ora 05.
Për mosrespektim të orës policore gjobat janë mbi 2.000 euro.
Ministri i Shëndetësisë, Venko Filipçe, nëpërmjet profilit të tij të Facecbook-ut rikujtoi se prej sot do të gjobitet çdo qytetar i cili nuk do të mbajë pajisje mbrojtëse për parandalimin e shpërndarjes së virusit korona.
“Prej sot gjoba për mosrespektim të dekretit për mbajtje të pajisjes mbrojtëse.
- Obligativisht të mbahet pajisje mbrojtëse (maskë, facoletë apo shall) që të mbulohet goja dhe hunda, në të gjitha vendet publike si dhe institucionet shtetërore, marketet, dyqanet, bankat, postat, transportin publik, institucionet shëndetësore dhe të ngjashme.
- Mbajtja e pajisjes mbrojtëse është e obligueshme edhe në vende të hapura, gjithmonë kur nuk mundet të mbahet distancë minimale prej dy metrave mes qytetarëve.
- Mbrojtja nuk është e obligueshme për qytetarët që qëndrojnë në oborr të shtëpisë familjare, vozisin biçikletë ose bëjnë sport në vend të hapur, (por duhet që obligativisht të mbajnë distancë prej 2 metrave), nëse udhëtojnë në automjet me personat me të cilët jetojnë, por edhe nëse gjenden në vend të hapur ku mund të mbahet distancë prej dy metrave.
Ndërkohë, personat juridik janë të obliguar që në objektet e tyre të sigurojnë mbajtje të mbrojtjes personale për të gjithë të punësuarit, si dhe të ndalojnë hyrje dhe lëvizje nëpër këto hapësira për çdo person fizik i cili nuk mban maskë.
Për mosrespektimin e këtij vendimi, parashikohen edhe gjoba prej 20 euro për personat fizik, ndërsa deri më 2000 euro për personat juridik.
Mbeten në fuqi të gjitha masat për mbrojtje nga KOVID-19, të miratuara nga Qeveria e Maqedonisë së Veriut.
