Ministria serbe Shëndetësisë, konfirmoi të premten rastin e parë me koronavirus.
Ministri i Shëndetësisë, Zllatibor Llonçar, tha se bëhet fjalë për një 43 vjeçar nga Subotica, një qytet në veri të krahinës së Vojvodinës, i cili kishte vizituar së fundmi disa herë Budapestin.
Ai tha se pacienti është vënë në karantinë në një spital të Suboticës meqë pas kontrolleve dhe analizave doli se ishte prekur nga koronavirusi,
“Analizat po u bëhen po ashtu edhe të gjithë personave me të cilët ishte në kontakt”, tha ministri serb, transmeton VOA.
Virusi është shtrirë në 90 vende të botës, përfshirë edhe Holandën e Kamerunin, që raportuan rastet e para të premten.
Në rajonin e Evropës Juglindore, Kroacia konfirmoi rastin e 11-të të premten. Bosnja ka raportuar dy raste, një burrë që punonte në Itali dhe fëmijën e tij.
Maqedonia e Veriut ka raportuar një rast, ndërsa deri tash, Mali i Zi, Kosova dhe Shqipëria nuk kanë raportuar asnjë rast me koronavirus.
Rumania ka raportuar shtatë raste të konfirmuara dhe sipas autoriteteve të atjeshme, pesë tashmë janë shëruar.