Më 18 shkurt të 1995-ës, pra 25 vite më parë, te Interi filloi epoka Moratti 2, me Massimo Morattin që mori drejtimin e klubit zikaltër nga Ernesto Pellegrini, disa vite pasi ekipi kishte qenë edhe në pronësi të babait të tij, Angelo, transmeton SS.
Tashmë Massimo nuk është më pronar i klubit, por ka mbetur tifozi numër një i zikaltërve, ndërsa në një intervistë për mediat italiane ka kujtuar detaje nga drejtimi i Interit, që kulmoi me vitin 2010, kur fituan tripletën e famshme.
“Nga dita e parë kujtoj kortezinë e Pellegrinit, që më çoi në dhomat e zhveshjes dhe më prezantoi me lojtarët, që ishin disi të habutur nga ai ndryshim i rëndësishëm. Më pas kemi fituar shumë dhe kemi kaluar momente të bukura”, u shpreh Moratti.
Tripleta ishte momenti më i rëndësishëm i historisë së Massimo Morattit në presidencën e Interit, ndërsa vetë ky i fundit tregon edhe vështirësitë për të arritur atë objektiv madhor, që përkon njëkohësisht edhe me vitin e fundit kur zikaltrit kanë fituar trofe.
“Për të arritur atë objektiv madhor, shërbyen shumë edhe aventurat negative me të cilat u ndeshëm, pasi luftonim kudër një Juventusi që sillej ashtu si të gjithë e mësuan më vonë. Erdhëm në rritje dhe arritëm të marrim ato kënaqësi për të cilat besoja vazhdimisht, por në një moment kisha menduar se nuk do ia dilnim”, deklaroi ish presidenti zikaltër.
Epoka Moratti nën drejtimin e Interit ishte e mbushur me kampionë ne “K” të madhe, duke filluar nga i preferuari Alvaro Recoba, te Roberto Baggio, Ronaldo e Pirlo e për të vijuar me heronjtë e tripletës së famshme. Vetë ish presidenti dhe pronari i klubit zikaltër kujton me nostalgji yjet që kanë veshur fanellën e Interit, ndërsa tregon se pishmani më i madh është që nuk i besoi më shumë Andrea Pirlos.
“Ronaldo mbetet pa diskutim më i jashtëzakonshmi nga këta që kam pasur në ekip. Është i paharrueshëm dhe ai që na bëri të njihemi në të 4 anët e globit. Nuk mund të lë pas edhe Roberto Baggion, një kampion me ADN zikaltër, që fitonte ndeshjet i vetëm në fushë. Më vjen keq për Pirlon, që doja ta mbaja me patjetër, pasi e shihja që kishte cilësi, por për fat të keq asnjë prej trajnerëve nuk i gjeti rolin e duhur në fushë dhe na iku nga duart”, rrëfen Moratti.
Tani Interi është në pronësi të kinezëve të Suning dhe drejtohet nga Antonio Conte, ndërsa këtë sezon është rikthyer të pretendojë për titullin kampion, pavarësisht se të dielën humbi një ndeshje direkte ndaj Lazios.
“Skuadrën e shoh në një formë mjaft të mirë dhe ndoshta humbja me Lazion mund të shërbejë për t’u rikthyer më të fortë dhe më të bindur drejt rrugës që kanë nisur. Conte ka bërë një punë mjaft të mirë dhe tani i duhet të integrojë edhe Eriksen, që është nga ata lojtarë që zgjidh ndeshjet i vetëm. Unë besoj se mund t’ia dalim këtë sezon”, deklaroi Moratti.