Punëtorët shëndetësorë, mjekët, infermieret, bashkëpunëtorët shëndetësor, mjekët e rinj specializantë dhe personeli ndihmës teknik do të kenë paga më të larta prej muajit të ardhshëm, njofton Portalb.mk.
Ministria e Shëndetësisë dhe Sindikata e Pavarur për Shëndetësi, Farmaci dhe Mbrojtje Shëndetësore dhe Sindikata e Qendrës Klinike kanë arritur marrëveshje për anekset e dy marrëveshjeve kolektive dhe i njëjti është nënshkruar disa ditë përpara fillimit me punë të qeverisë teknike, kumtoi sot në konferencë për shtyp ministri i Shëndetësisë, Venko Filpçe.
Filipçe njoftoi se do të ketë rritje prej 20% për kuadrin arsimor, për mjekët specialist 25%, mjekët e përgjithshëm 15%, infermieret 10%, punëtorët shëndetësor dhe personelin ndihmës teknik 5%.
Sipas tij, bëhet fjalë për marrëveshje e cila ka ardhur pas procesit të hapur dhe gjithëpërfshirës të dialogut social, të cilin e kanë udhëhequr në vazhdimësi në vitet e kaluara, duke pasur parasysh ashtu siç ka thënë, se kjo rritje e rrogave praktikisht është e treta në dy vitet e kaluara, ndërkaq e katërta nëse përfshihet edhe rritja e përqindjeve për kujdestari.