Po shijon pushimet që pas largimit nga Juventus verën që lamë pas, por ka ardhur koha që Massimiliano Allegri-n ta shohim përsëri në krye të një ekipi. Paris Siant Germain me në krye drejtorin sportiv Leonardo janë vendosur në kërkim të një zëvendësuesi për Thomas Tuchel dhe emri i italianit shikohet si më i kuotuari për të marrë drejtimin e gjigantit parisien, transmeton TopChannel.
Tuchel po bën shumë mirë në këtë sezon me djemtë e tij, me të cilët aktualisht ndodhet në vendin e parë në kampionat, por gjithashtu i siguroi dhe vendin e parë në fazën e grupeve të “Uefa Champions League”, duke vazhduar më tej në tur. Por klubi duket se nuk është i kënaqur me shërbimet e tij dhe për këtë arsye dëshirojnë që ta zëvendësojnë. Allegri ofron më siguri në krye të pankinës, pasi këtë gjë e ka konfirmuar me Juventusin dhe Milanin në Serie A.
Gjithashtu drejtori sportiv Leonardo e njeh shumë mirë teknikun dhe ruajnë raporte të shkëlqyera së bashku, dhe është pikërisht Leonardo ai që po shtynë me forcë arritjen e një marrëveshjeje mes palëve. Në muajt e fundit për postin e trajnerit të PSG-së janë përfolur edhe emra si Mauricio Pochettino dhe Carlo Ancelotti, me këtë të fundit që tashmë është transferuar në Angli tek Everton. Në rastin e një marrëveshjeje Allegri nuk do ta merrte drejtimin e skuadrës në mes të sezonit por në verën e vitit të ardhshëm, duke e nisur sezonin e ri futbollistik me një merkato të ideuar sipas planeve të tij.