Prishtina ishte bërë gati që ta mirëpriste ish-presidentin amerikan, Bill Clinton, dhe ish-sekretaren e shtetit, Madeleine Albright, transmeton Koha.net.
Për të pasur siguri më të lartë, të mërkurën, i tërë bulevardi “Bill Clinton” në kryeqytet ishte i rrethuar nga pjesëtarë të policisë. Policia madje kishte larguar të gjitha veturat nga hapësira e dedikuar për parkim për banorët e lagjes “Dardania”.
Por, me këtë veprim të policisë nuk janë të kënaqur banorët. Vegim Rashiti thotë se pa paralajmërim iu konfiskua vetura e tij. Ai thekson se për pasojë është detyruar t’i paguajë kompanisë shërbimin për transportimin e veturës.
Këtë aksion të policisë, Rashiti e quan të padrejtë pasi thotë se nuk ka parë asnjë njoftim paraprak. Në anën tjetër, një pronar i një biznesi në këtë lagje thotë se policia me kohë ka njoftuar që banorët duhet t’i largojnë automjetet.
Policia thotë se me kohë i ka lajmëruar banorët që t’i largojnë veturat nga hapësirat e parkingut, në mënyrë që ata të mos dëmtohen.
“Njësia policore e S. P. Jugu e ndërrimit te mëngjesit 07 – 15:00, në datën 11.06.2019, ka dalë në sheshin Bill Klinton, ka njoftuar bizneset, qytetarët dhe pronarët e automjeteve se në datën 12.06.2019, duke filluar prej orës 07:00, nuk lejohet parkimi i automjeteve në atë lokacion. Po ashtu, një njësi tjetër e këtij stacioni, në datën 11.06.2019, prej orës 18:30, ka shpërndarë fletushka informuese, të cilat i kanë vendosur nëpër parafangot e të gjitha automjeteve të parkuara në dy parkingjet afër sheshit ‘Bill Klinton’”, ka thënë Flora Ahmeti zëdhënëse në Policinë e Kosovës për rajonin e Prishtinës.
Në kuadër të aktiviteteve për shënimin e 20-vjetorit të çlirimit, ish-presidenti amerikan mori pjesë edhe në përurimin e një pllake afër shtatores së tij në bulevardin “Bill Clinton”.