Fondi i Sigurimit Pensional dhe Invalidor të Maqedonisë së Veriut (FSPIMV), udhëhequr nga drejtori Shaip Zendeli, së bashku me Departamentin e Pensioneve të Ministrisë së Punëve dhe Mirëqenies Sociale të Republikës së Kosovës (DP-MPMSRK) , të udhëhequr nga drejtori Bahri Xhaferi, sot në Prishtinë nënshkruajtën marrëveshje të re për bashkëpunim, transmeton Portalb.mk.
FSPIMV informon se “kjo marrëveshje ka për qëllim ofrimin e ndihmës dhe mbështetjes në shkëmbimin elektronik të të dhënave në fushën e sigurimit pensional dhe invalidor ndërmjet dy institucioneve, krijimin e marrëdhënieve reciproke dhe lehtësimin e realizimit të pensionit pa ndërprerje të përfituesve të pensionit në këto dy shtete”.
Ndër të tjera, në komunikatë tregohet se një nga qëllimet e kësaj marrëveshje është edhe reduktimi i shpenzimeve administrative, si dhe parandalimi i pagesave të paligjshme të pensioneve.