Po vazhdojnë hetimet rreth rastit të eliminimit të politikanit serb, Oliver Ivanoviq.
Shumë akuza në drejtim të institucioneve të drejtësisë, kishin bërë njerëzit e partisë së Oliver Ivanoviqit për eliminimin e liderit të partisë Iniciativa Qytetare, transmeton Ora Info.
Por, tashmë edhe zyrtarë të partisë së tij janë duke u hetuar si të dyshuar në krimin ndaj Ivanoviqit.
Prokuroria ka nisur hetimet për Silva Arsoviqin, e cila punon si administratore në zyrat e SDP-së.
Arsoviqi, sipas Prokurorisë, dyshohet se kishte qenë afër kamerave të sigurisë në këtë parti, të cilat nuk kishin funksionuar pikërisht në momentin e qëllimit të Oliver Ivanoviqit.
Prokurori, i cili po heton rastin, në të cilin i dyshuar kryesor është nënkryetari i Listës Serbe Milan Radojçiq, thotë se ka pranuar një ftesë nga avokati i tij për ta intervistuar në Serbi, por që ai këtë nuk e ka pranuar.
Hoxha insiston se intervistimi i Radojiçiqit dhe gjithë të dyshuarve për krimin do të bëhet në zyrat e Prokurorisë Speciale.
Përkundër kërkesave drejtuar autoriteteve në Serbi, që të japin qasje në bisedat dhe telefonatat e Ivanoviqit para krimit, Prokurorisë në Kosovë i janë dhënë vetëm numrat të cilët i ka përdorur ai.
Nënkryetarja e Iniciativës Qytetare, Ksenija Bozhoviq, nuk është deklaruar për hetimet që ka nisur Prokuroria për një punëtore të kësaj partie.
Përgjigje nuk kanë dhënë as Prokuroria e Ministria e Drejtësisë në Beograd.
Por, Milan Radojiçiq, që vazhdon të kërkohet nga Prokuroria në Kosovë, lirshëm vazhdon aktivitetin në Beograd, ku është zgjedhur edhe kryetar i Federatës së Futbollit për Kosovë.
Ditëve të fundit, janë dy krerët më të lartë të shtetit të cilët kanë akuzuar njërin-tjetrin për takimet që kishin me të dyshuarin për krimin ndaj Oliver Ivanoviqit.
Derisa presidenti Hashim Thaçi tha se dëboi nga Kosova mikun e kryeministrit Ramush Haradinaj, ky i fundit deklaroi se me Milan Radojiçiqin u takua bashkë me Thaçin në zyrën e tij.