Dëbimi i ambasadorit iranian në Tiranë Gholamhossein Mohammadnia si dhe një tjetër zyrtar i ambasadës kanë sjellë reagimin e kryeministrit të Izraelit Benjamin Netanyahu, i cili ka falenderuar qeverinë dhe shqiptarët.
Përmes një postimi në rrjetin social, Netanyahu shkruan se lajmi i ardhur nga Shqipëria ishte pozitiv dhe se Izraeli qëndron në krah të Shqipërisë, transmeton Gazeta Express.
“Lajme të rëndësishme nga Shqipëria sot. Kryeministri i Shqipërisë, Edi Rama, ka dëbuar ambasadorin Iranian nga Tirana. Me këtë, kreu i qeverisë Rama i ka dërguar një mesazh të qartë regjimit radikal islamik të Iranit – që komplotet e sulmeve terroriste kanë një kosto,” shkruan Netanjahu dhe vijon me këto fjalë:
“ Izraeli qëndron në krah të Shqipërisë, ashtu siç qëndron në krah të çdo shteti që e sheh regjimin Iranian për atë që është, kërcënimin më të madh kundër paqes dhe sigurisë në botë”
Ditën e djeshme Shqipëria shpalli non grata ambasadorin iranian Mogammadnia si dhe një zyrtar të ambasadës, me argumentin se janë të përfshirë në aktivitete që cënojnë sigurinë në vend.