Zëvendësministri nga Kosova dha dorëheqje nga qeveria Rama
Përmes një postimi në llogarinë e tij në Facebook, Çeku ka shkruar se ka kërkuar nga kryeministri, Edi Rama që do të dorëhiqet nga posti i zëvendësministrit pasi që shumë shpejt do të bëhet baba.“Pas një periudhe shumë të gjatë përpjekjesh dhe mundimesh, Eli dhe unë jemi të lumtur që më në fund kemi nisur rrugëtimin tonë për t’u bërë prindër, një nga qëllimet dhe dëshirat tona jetësore. Deri në këtë pikë kemi arritur me shumë sakrificë dhe të dy jemi tërësisht të përkushtuar që ëndrrën tonë për t’u bërë me fëmijë ta jetësojmë me sukses”, ka shkruar Çeku, transmeton Lajmi.net.
Ky është postimi plotë i Hajrullah Çekut:
Pas një periudhe shumë të gjatë përpjekjesh dhe mundimesh, Eli dhe unë jemi të lumtur që më në fund kemi nisur rrugëtimin tonë për t’u bërë prindër, një nga qëllimet dhe dëshirat tona jetësore. Deri në këtë pikë kemi arritur me shumë sakrificë dhe të dy jemi tërësisht të përkushtuar që ëndrrën tonë për t’u bërë me fëmijë ta jetësojmë me sukses. Ky moment i ri në jetën tonë më ka bërë të rimendojë gjithë situatën dhe angazhimet e mia aktuale, marrë parasysh edhe faktin që gjatë kësaj periudhe Eli dhe unë kemi jetuar të ndarë, me lëvizje të kufizuara mes Prishtinës dhe Tiranës. Ajo që e mendoj me mendje dhe e ndiej me shpirt në këtë moment është kjo: duhet ta bëj pjesën që më takon. Dhe kjo parasëgjithash nënkupton prezencën fizike pranë saj. Për hir të së vërtetës, dhe sepse biologjia na e përcakton kështu, pjesa dërmuese e sakrificës së bërë deri tash mban firmën e Elit. Prandaj edhe besoj që nga tani e tutje më takon të mbart më tepër mbi supe. Jo se ndonjëherë do të arrij në nivelin e njëjtë me të, por të paktën dua të sigurohem që e jap të gjithën që mund ta jap.
Thellësisht mirënjohës dhe më shumë se asnjëherë më parë i përkushtuar për të vazhduar shërbimin ndaj Shqipërisë në forma të tjera, me fokus në thellimin e bashkëpunimit me Kosovën.