Fondi për të Drejtën Humanitare në Kosovë tha se që nga tetori i vitit 1999 janë dënuar 39 persona për krime lufte.
Kjo shifër u bë e ditur gjatë publikimit të një pasqyre të gjykimeve për krimet e luftës në Kosovë gjatë periudhës 1999-2018, ku janë zhvilluar 48 gjykime për krimet e luftës në vend me gjithsej 111 persona të akuzuar.
Prej tyre 25 lëndë janë ndaj serbëve, 19 ndaj shqiptarëve, 3 lëndë ndaj malazezëve dhe një ndaj komuniteteve Romë, Ashkali dhe Egjiptian, transmeton VoA.
“Në 19 lëndë ndaj shqiptarëve kemi 61 të akuzuar, prej tyre 23 të liruar, 34 të dënuar, dy janë në arrati dhe 2 janë momentalisht në process. Te 25 lëndë ndaj serbëve, kemi 44 të akuzuar, 13 persona të liruar, 4 të dënuar dhe 24 në arrati. Kemi tri lëndë ndaj pjesëtarëve malazias, ku në total janë të akuzuar pesë malazezë dy janë të liruar, një është dënuar dhe dy janë të arratisur”,- tha Amer Alija nga Fondi për të Drejtën Humanitare Kosovë.
Çështja e gjykimeve për krimet e luftës në Kosovë vazhdon të mbetet një nga sfidat më të mëdha të vendit.
Parlamenti i Kosovës miratoi të enjten projektligjin në parim për gjykimin në mungesë për krime lufte, që sipas deputetëve, do t’i mundësojë organeve të drejtësisë gjykimin dhe dënimin e autorëve të këtyre krimeve, edhe pa prezencën e tyre.
Mbi dhjetë mijë veta janë vrarë gjatë luftës në Kosovë që mori fund me ndërhyrjen e trupave paqeruajtëse të NATO-s.
Ndërkaq, nuk dihet asgjë për fatin e mbi një mije e 600 personave që llogariten të zhdukur.