Sh.m.a.i.k ILLYRICUM LIBERTAS – Tetovë, reagon ndaj aksioneve të fundit të MPB në rajonin e Gostivarit dhe Tetovës, me çrast janë arrestuar dhe më pas deportuar një numër i madh i shtetasve të Republikës së Shqipërisë.
“Në të shumtën e rasteve bëhet fjalë për banorë me origjinë nga zonat e thella verilindore të vendit që duke qenë në gjendje të rëndë ekonomike-sociale, gjatë muajve të verës qëndrojnë në Pollog me shpresën e sigurimit të ekzistencës së familjeve të tyre. Aksionet tashmë të përsëritura disa vite me radhë nga MPB e Gostivarit dhe Tetovës, na sjellin në kujtesë veprimet e dikurshme greke të tipit “Fshesa”, të motivuara politikisht dhe me pasoja të rënda për shtetasit shqiptar” thonë nga IL.
Sipas tyre, policia e Tetovës dhe Gostivarit ka shumë punë tjera për të rregulluar në qytetet në fjalë të cilat gëlojnë nga hajdutë e kriminelë të ndryshëm vendas, që bredhin të lirë rrugëve duke paraqitur rrezik të madh për pronën, dinjitetin e deri edhe jetën e qytetarëve tanë.
“Apelojmë që MPB të bëjë punën e vet për të cilën paguhet nga taksapaguesit dhe të mos bjerë pre e aksioneve të motivuara politikisht të përzënies së varfanjakëve shqiptarë nga Kukësi apo Librazhdi, që këtu janë të mirëpritur nga popullata shqiptare dhe ndjehen si në shtëpitë e tyre. ” apelojnë nga IL./portalb/