Në Japoni për herë të parë një pilote femër certifikohet për të fluturuar me avion luftarak F-15, transmeton Anadolu Agency (AA).
Sipas lajmit të agjencisë japoneze Kyodo të lajmeve mësohet se togerja 26 vjeçare Misa Matsushima me detyrë në Forcat e Armatosura të Mbrojtjes Ajrore të Japonisë ka marrë certifikatën për përdorimin e avionit luftarak pas përfundimit të trajnimit të fluturimeve me F-15.
Theksohet se Matsumisha është femra e parë që ka fituar të drejtën e pilotes për avion luftarak në historinë e vendit.
Ndërkohë njoftohet se pilotja do të jetë me detyrë në njësinë 5 të Bazës Ajrore Nyutabaru e cila ndodhet në rajonin Miyazaki, në jug të vendit. Kjo njësi shërben për ndërhyrje të menjëhershme ndaj avionëve që hyjnë pa leje në hapësirën ajrore të Japonisë.
Ministria e Mbrojtjes synon të dyfishojë numrin e anëtarëve të stafit femra që punojnë në njësitë ushtarake duke hequr kufizimet në fushat e punës së grave. Në këtë kontekst, Forcat ajrore japoneze në vitin 2015 hoqën rregulloren që i pengonte pilotët femra të merrnin pjesë në misionet luftarake dhe zbuluese.