Kancelarja gjermane Angela Merkel në Berlin është takuar me ministrin rus të Punëve të Jashtme, Sergey Lavrov, për të biseduar për ngjarjet e fundit në Lindjen e Afërt dhe në Siri, njoftuan zyrtarët, transmeton Anadolu Agency (AA).
Lavrov dhe kryeshefi i Shtatmadhorisë ruse, Valerij Gerasimov, vizituan Berlinin pas takimit të ditës së djeshme me homologët izraelitë në Tel Aviv.
“Bisedat në masë të madhe ishin të fokusuara në Lindjen e Afërt veçanërisht për Sirinë. Po ashtu biseduan për përleshjet në lindje të Ukrainës”, tha zëdhënësja e Qeverisë gjermane, Ulrike Demmer.
Demmer përmendi se takimin e dakorduan javën e kaluar kancelarja gjermane Merkel dhe presidenti rus, Vladimir Putin.
Në takim mori pjesë edhe ministri gjerman i Punëve të Jashtme, Heiko Maas.