Gjatë një operacioni në Vlorë policia ka sekuestruar 671 kilogramë kanabis dhe ka arrestuar një person, transmeton Anadolu Agency (AA).
Drejtoria Vendore e Policisë Vlorë në bashkëpunim me Delta Forcë kanë zhvilluar operacionin e koduar “Karaburuni”, kundër trafikimit të lëndëve narkotike.
Sipas njoftimit nga Drejtoria e Përgjithshme e Policisë së Shqipërisë, në Gadishullin e Karaburunit, u gjetën dhe sekuestruan 671 kilogramë lëndë narkotike e llojit kanabis sativa.
Prokuroria e Rrethit Gjyqësor Vlorë do të vazhdojë hetimet për veprën penale “Trafikimi i narkotikëve, kryer në bashkëpunim”.