Kryeministri Zoran Zaev deklaroi se nuk ka asgjë të paligjshme në atë që vëllai i tij, Vice Zaev është shfrytëzues i përhershëm i tokës ndërtimtare shtetërore në Komunën e Strumicës, që e ka marrë derisa Zaev ka qenë kryetar i komunës, njofton Portalb.mk.
Ai tha se procedura ka qenë transparente dhe e ligjshme. Zaev thotë se edhe LSDM edhe Komuna e Strumicës i kanë demantuar gjetjet e liderit të VMRO-DPMNE-së, Hristijan Mickoski.
“Akuzat e Mickoskit flasin për seriozistetin e personit”, tha Zaev.
Në pyetjen nëse ngelet fakti se Vice Zaev e ka fituar tokën, Zaev tha se parcela fillimisht është blerë nga një person tjetër.
Në pyetjen se sa është profiti i zaevëve në atë tokë, kryeministri tha se aq sa ka kushtuar ndërtimi.
“60% e parave të investuara nuk janë kthyer. Bëhet fjalë për shitblerje të tokës dhe në këtë biznes duhet që të kalojnë disa vjet që investimi të paguhet”, tha ai.