Në Ruandë u zbuluan katër varre masive, të cilat besohet se datojnë nga gjenocidi i vitit 1994.
Varret u zbuluan në qarkun Gasabo, jashtë kryeqytetit Kigali, dhe rreth 200 trupa u zhvarrosën, transmeton REL.
Rreth 3,000 njerëz nga kjo zonë janë zhdukur gjatë masakrave dhe banorët lokalë besojnë se trupat e tyre mund të gjenden në varre masive.
Rreth 800,000 njerëz – tutsisë etnikë dhe hutusë të moderuar – janë masakruar nga milicitë hutu brenda 100 ditësh.
Varret u zbuluan dy javë pasi u mbajtën përkujtime për të shënuar fillimin e vrasjeve.