Kancelarja gjermane, Angela Merkel, përshëndeti sulmet ajrore në Sirinë si përgjigje të sulmit kimik të javës së kaluar të forcave të Bashar al-Asadit në Duma, transmeton Anadolu Agency (AA).
Në një deklaratë me shkrim të shtunën, Merkel theksoi se sulmi i përbashkët i SHBA-së, Britanisë së Madhe dhe Francës në veçanti synon shkatërrimin kapaciteteve të mundshme të armëve kimike në Siri dhe synon parandalimin e përdorimit të mëtejshëm të armëve të ndaluara.
“Mbështesim aktin e aleatëve tanë të SHBA-së, Britanisë dhe Francës, si anëtarë të përhershëm të Këshillit të Sigurimit të OKB-së, të cilat në këtë mënyrë morën përgjegjësinë. Operacioni ushtarak ishte i domosdoshëm dhe i duhur për të mbështetur ndalimin ndërkombëtar për përdorimin e armëve kimike dhe për të paralajmëruar regjimin sirian”, tha Merkel.
Si përgjigje e sulmit me armë kimike në Duma më 7 prill, Shtetet e Bashkuara të Amerikës (SHBA), Britania e Madhe dhe Franca bombarduan pozita të regjimit të Asadit në Siri.