Pasi që dje zëvendëskryeministri për Çështje Evropiane, Bujar Osmani nëpërmjet profilit të tij në facebook njoftoi se është kompletuar dokumentacioni për realizimin e projektit të ndërtimit të vendkalimit kufitar Stançiq- Bellanovc, sot i pyetur nga Portalb.mk se çka konkretisht do të thotë kompletimi i dokumentacionit dhe kur pritet nisja e ndërtimit, ai tha se që sot kompania e angazhuar nga Delegacioni Evropian mund të fillojë me punë, transmeton Portalb.mk.
“Leja e ndërtimit ka qenë problem , për shkak se ju kam treguar disa herë, objekti i pikës kufitare gjendet në dy anët e kufirit dhe ligjet e Maqedonisë dhe të Kosovës japin leje ndërtimi vetëm për objekte që kanë tërësi funksionale. Ky objekt as në Maqedoni nuk e ka tërësinë funksionale për shkak se vetëm gjysma e objektit është në Maqedoni kurse gjysma e objektit në Kosovë. Jemi të detyruar të ndryshojmë edhe ligjin që të mundësojmë për pikat kufitare të mos vlejë kjo rregull dhe pas peripetive të shumta shumëvjeçare përfundimisht dje Ministria e Transportit ka nënshkruar lejen e ndërtimit dhe prej sot kompania që e ka angazhuar pala kosovare, Delegacioni evropian në Prishtinë mund të fillojë me punë dhe mekanizim për ndërtimin e objektit”, tha Bujar Osmani pasi prezantoi Planin 1-6-9 në një pytetje të gazetarëve.
Ndërsa sa i përket emrit të kompanisë e cila duhet t’i kryejë punimet, Osmani tha se duhet pyetur te Delegacioni BE-së në Prishtinë për shkak se, siç tha, ka qenë obligim i tyre për të angazhuar kompaninë.
