Zbresin hijet në heshtje
Lëshohen brigjeve të kanjonit
Dhe shkojnë rrëshqitazi luginës së mollëve
Kapërcejnë pranë shelgjeve
E prekin pastaj faqen e kaltër të lumit
E cila luhatet midis brigjeve
Midis gjelbërimit të thellë
Përbirohen nëpër gjethet e dendura
Duke lënë vrragë pas vetes
Dhe vazhdojnë tutje
E kapërcejnë kurrizin e malit
Pastaj zbresin në anën tjetër
Shkojnë e ulen në fushat e buta
Me grurë të artë
Duke e prekur gëzimin e vitit të begatë
I cili i grish udhëtarët
Urdhëroni
Gostia do të jetë e pasur
Në fshat ka dasmë
E martojnë djalin për mallë
E hijet
Zgjaten mbi fshat
Dhe e fusin fshatin në kornizën e zezë
Poezi nga Asllan SELMANI
Zgjodhi Xhabir AHMETI