Teatri i Tetovës sot, në regji të Sulejman Rushitit paraqet premierën e “Volpone”-s (VIDEO)

Sot, më 9 mars, Teatri i Tetovës do të sjellë premierën e “Volpone”-s në regji të Sulejman Rushitit, sipas Ben Johnson e përpunuar nga Stefan Cvajg, njofton Portalb.mk.

“Volpone” nëpërmjet aktorëve Arsim Kaleci, Elmir Sejfullai, Argjend Hasani, Hasim Memishi, Shkumbin Zeqiri, Berat Saliu, Sami Mustafa, Linda Shabani dhe Elmedina Ameti do të trajtojë çështjen e lakmisë, grykësisë së njerëzve. “Volpone” paraqet komedi që shpërfaq aktorë me tipare kafshërore e që humbasin arsyen nga dashuria për të gllabëruar, për të grabitur.

Aktorët e “Volpone”-s në skenë do të shfaqen me ndihmën e tekstit të përkthyer nga Artur Lena, me asistent regjie të Linda Shabanit dhe me kostumet e përgatitura nga Ines Golja.

Premiera do të shfaqet në Teatrin e Tetovës me fillim prej orës 19:00.