Kryeministri Sali Berisha gjatë fjalës së tij në konferencën e organizuar me forumin ekonomik, IDB, ka thënë se, Shqipëria ka ruajtur me sukses një rritje ekonomike, në një kohë që Europa po përballet me një krizë borxhesh.
“Në 4 vitet e fundit ka pasur rritje ekonomike më të lartë se vendet e rajonit si dhe janë rritur investimet e huaja dhe kjo falë modelit të implementuar, bazuar në taksat e ulëta. Qeveria jonë është e bindur se mënyra më e mirë për të përballuar krizën është mbështetja ndaj bizneseve”, u shpreh Berisha.
Kryeministri shprehi angazhimin e qeverisë kundër taksave të larta, duke theksuar se do mbahet borxhi nën kontroll.
Berisha tha se, edhe investimet e huaja kanë shënuar një rritje, ndërsa ka vlerësuar se edhe turizmin si një element të rëndësishëm në ekonominë e vendit, ku tha se numri i vizitorëve dhe turistëve është rritur më shumë se 13 herë.
Berisha shprehu angazhimin e qeverisë shqiptare për të mbështetur çdo biznes të huaj që investon në vend. Kryeministri vlerësoi se investitorët e huaj kanë arsye të forta të investojnë në Shqipëri, pasi ndërkohë që Europa është në kohë krize, Shqipëria ne 4 vitet e fundit ka patur rritje 4 herë më të madhe se sa mesatarja e rajonit.
Në këtë kontekst Berisha vlerësoi se Shqipëria është Kina e vogël e Europës, pasi tregu i punës është i ngjashëm me të Kinës, me njerëz punëtorë dhe të edukuar, prandaj shtoi ai çdo sipërmarrës ka më shumë arsye për të investuar në këtë vend.