Policia e Kosovës ka konfirmuar sulmin me zjarrë ndaj Oliveq Ivanoviq, i cili sipas komunikatës pas plagëve të marra ka ndërruar jetë në spitalin e Mitrovicës, trransmeton Lajmi.net.
Policia thotë sulmi është kryer nga persona të panjohur dhe se është duke punuar në zbardhjen e rastit.
Deri më tani sipas policisë është gjetur një veturë e djegur nga e cila dyshohet se është kryer sulmi.
Komunikata e plotë:
Rreth orës 08:10 min, në rrugën “Sutjeska” në veri të Mitrovicës, është regjistruar një incident me përdorim armë zjarri, me ç’rast persona deri më tani të panjohur kanë shtënë në drejtim të z. Oliver Ivanovic, i cili fillimisht është plagosur në afërsi të zyrës së tij të punës.
Viktima është dërguar në qendrën spitalore në veri të Mitrovicës për reanimim, ndërsa mjekët kujdestarë kanë konstatuar vdekjen e tij.
Njësitë policore kanë dalë në vendngjarje ndërsa këqyrja e vendit të ngjarjes është në vazhdim e sipër. Në vendngjarje janë gjetur prova materiale të cilat do të përdoren në procedurën e mëtejme hetimore.
Gjithashtu, rreth orës 09:15min, në rrugën “Vojvode Putnika” në veri të Mitrovicës, është lokalizuar një veturë private e markës “Opel Astra”, pa targa të regjistrimit, të cilës paraprakisht i ishte vënë zjarri, ndërsa Policia dyshon se mund të jetë e lidhur me rastin e vrasjes.
Për të gjitha rrethanat e rastit dhe veprimet e ndërmarra të Policisë është informuar prokurori i Shtetit, i Prokurorisë Themelore në Mitrovicë, i cili ka dalë në vendngjarje.
Policia e Kosovës mbetet e përkushtuar në zbardhjen sa më parë të këtij rasti dhe sjelljen e personit/ave të dyshuar para organeve të drejtësisë.
LEXO EDHE:
- Kjo është vetura nga e cila u vra Oliver Ivanoviç (FOTO)
- Kush ishte Oliver Ivanoviq, politikani i njohur serb i vrarë sot në Mitrovicë?
- Atentat në veri të Mitrovicës, vritet lideri i serbëve Oliver Ivanoviç
- Presidenti Thaçi e dënon vrasjen e Oliver Ivanoviqit, kërkon të zbardhet sa më shpejtë rasti
- Haradinaj: Vrasja e Ivanoviqit të mos përdoret për politikë ditore