Maqedonia duhet ta respektojë marrëveshjen me Serbinë dhe të votojë përmbajtur për hyrje të Kosovës në UNESCO pa dallim se a do të votohet këtë vit apo vitin e ardhshëm. Siç transmeton Plusinfo.mk, kështu ka porositur kryeministrja e Serbisë, Ana Bërnabiq në intervistë për RTS, njofton Portalb.mk.
Deklarata e saj vjen pas takimeve të së shtunës të nivelit të lartë të shteteve të Ballkanit Perëndimor që u mbajt në Durrës të Shqipërisë. Në këtë takim, Bërnabiq dhe Zaev i vendosën pikë polemikave të javës së kaluar që u nxitën me tërheqjen e personelit diplomatik serb të Maqedonisë nga Serbia.
E pyetur se a arriti Zaevi të ikë në mënyrë diplomatike nga çështja e Kosovës, Bërnabiq ka theksuar se marrëveshje ka dhe ajo duhet të respektohet.
“E dëgjova se çfarë tha. U shpreh se me shumë gjasë këtë viti ajo nuk do të jetë temë dhe se do të shohim vitin tjetër. Unë nuk do të hyja në spekulime se a do të jetë këtë vit kjo temë diskutimi apo jo, me rëndësi është që ne të gjithë të përmbahemi në marrëveshjet e tona. Si gjatë këtij viti, po ashtu edhe vitin e ardhshëm. Në të gjitha rrethanat ne do të vazhdojmë me atë dialog. Unë besoj në partnerët tanë rajonal se do ta mbajnë fjalën”, tha Bërnabiq.
Përndryshe, në takimin rajonal të Durrësit u hodh një tjetër hap drejt afrimit ekonomik të vendeve të Ballkanit. Takimi shërbeu edhe si shkëndijë për një tjetër zhvillim pozitiv: Kryeministrja serbe, Ana Bernabiq ftoi homologun e saj maqedonas, Zoran Zaev, për vizitë në Beograd në muajin nëntor.
Ndalesa e tij, siç njoftuan mediat do të përdoret për një takim të përbashkët të përfaqësueve nga qeveritë e të dy vendeve. Ftesa vjen në mesin e tensioneve që shkaktoi tërheqja e të gjithë stafit të Ambasadës serbe në Shkup.
LEXO: Vuçiq e fton Zaevin të mbajnë seanca të përbashkëta qeveritare