Për herë të parë në historinë parlamentare të Republikës së Maqedonisë seanca konstituive zgjati 22 ditë pune në periudhë prej 4 muaj, kundrejt atyre që normalisht duhet të zgjatin prej 1 deri 2 ditë. Sipas organizatës joqeveritare “MOST”, kjo ka ardhur si pasojë se kryesuesi i seancës konstituive, Trajko Veljanoski ka keqpërdorur pozitën e vet dhe ka lejuar që deputetët e VMRO-DPMNE-së të diskutojnë me replika dhe kundër-replika ndërmjet vete, njofton Portalb.mk.
Sipas përfundimeve të MOST deputetët e VMRO-DPMNE-së 1.352 herë kanë shkelur Rregulloren e Kuvendit, ndërsa deputetët e LSDM-së 148 herë. Të gjithë deputetët e VMRO-DPMNE-së janë paraqitur për fjalim, por vetëm njëri prej tyre iu është përmbajtur Rregullores së Kuvendit.
“Shtyrja e seancës konstituive ka ardhur si pasojë e shkeljeve të shumta të Rregullores së Kuvendit nga ana e deputetëve të VMRO-DPMNE-së. Në asnjë prej 1.566 shkeljeve kryesuesi nuk e mori të drejtën e fjalës, që nënkupton se ai nuk pengoi shkeljen e Rregullores. Pesë deputetëve të LSDM iu është tërhequr vërejtja kurse ata nuk e kanë shkelur Rregulloren. Në shtatë fjalime të koalicionit të VMRO-DPMNE-së kryesuesi ka përmendur Rregulloren më shumë se dy herë, por nuk mori të drejtën e fjalës, edhe pse tërheqja e disa hershme e vërejtjes nënkupton marrje e të drejtës së fjalës”, thonë nga MOST.
Nga MOST vlerësojnë se zgjatja e seancës konstituive ka shkaktuar edhe shtyrjen e ndryshimit të pushtetit, paralizë të pushtetit legjislativ dhe ekzekutiv.
Përndryshe, seanca konstituive kuvendore filloi më 30 dhjetor të vitit 2016, por u ndërpre, për shkak se nuk u sigurua shumicë parlamentare për zgjedhje të kryetarit të Dhomës ligjdhënëse. Kuvendi punës iu kthye në fund të marsit kurse deri më 27 prill deputetët e VMRO-DPMNE-së, me replikat dhe kundër-replikat ndërmjet vete bënë që seanca konsitutive të zgjasë katër muaj.