“Diskriminimi në baza etnike në Maqedoni, fatkeqësisht, vazhdon edhe më tutje dhe shtrihet në çdo aspekt. Rasti i fundit është mospërfshirja e kampiones në karate, Azra Curri në reprezentacionin shtetëror të Maqedoni”, thonë nga Lëvizja BESA në lidhje me lajmin e publikuar për largimin e Azrës nga karateja, njofton Portalb.mk.
Në lidhje me këtë nga kjo parti thonë se dënojnë ashpër veprimin e Federatës së Karatesë së Maqedonisë.
“Lëvizja BESA dënon ashpër këtë veprim Federatës së Karatesë së Maqedonisë, e cila pa dhënë asnjë shpjegim përjashtoi kampionen nga reprezentacioni shtetëror vetëm pse ishte shqiptare”, thuhet në reagimin e Lëvizjes BESA.
Në kumtesë më tej thuhet se diskriminimi në sport është i papranueshëm dhe se nëpërmjet tij duhet të bashkohen të rinjtë, e jo të ndahen.
“Për Lëvizjen BESA është i papranueshëm diskriminimi që bëhet në fushë të sportit. Sporti duhet t’i bashkojë të rinjtë pavarësisht se cilës etnie i përkasin dhe të shemb muret ndarëse. Por, fatkeqësisht, pabarazia dhe diskriminimi është duke u shfaqur edhe në këtë sferë siç ishte edhe rasti në ndeshjen e futbollit që u mbajt në Shkup midis Real Madridit dhe Mançesterit, në të cilin Federata e Futbollit të Maqedonisë organizoi vetëm manifestim maqedonas dhe u diskriminua elementi shqiptarë përpara ndeshjes së futbollit”, thonë nga Lëvizja BESA.
LEXO: Azra Curri tërhiqet nga sporti, i mohohet pjesëmarrja në KB në Spanjë