Për 139 përkthyes gjyqësorë të cilët kanë dhënë provimin për 19 gjuhë, sot në Ministrinë e Drejtësisë iu dhanë vendimet.
“Nga shtatori i vitit 2008 deri tani me sukses janë kryer 13 sesione për kontrollim të njohurive, me çka provimin kanë kaluar gjithsej 1.589 përkthyes për 24 gjuhë të huaja dhe gjuhët e etniteteve në Maqedoni”, tha ministri i drejtësisë Bexheti.
Përkthyesit, siç thotë Bexheti janë shpërndarë në 27 gjykata themelore të Republikës. Në këtë mënyrë, sipas tij Maqedonia përmirëson gjendjen për plotësimin e kritereve të Bashkimit Evropian (BE) në zbatimin e shumë-gjuhësisë dhe përdorimit publik të gjuhëve, si praktikë e konfirmuar në BE.
Reformat në gjyqësi në planin e sigurimit të së drejtës së përkthyesit gjyqësor me ndryshimet e bëra në ligjet, kanë kontribuar të fitohen përkthyes të trajnuar mirë dhe me eksperiencë të cilët do të kryejnë punën e tyre në mënyrë profesionale dhe me përgjegjësi.
Testimi për njohjen e gjuhëve është bërë nga profesorë nga institucionet e shkollimit të lartë në Maqedoni, nga përkthyes gjyqësor dhe institucione tjera.