Tito Vilanova ndërroi jetë. Në pasditen e së enjtes u mësua se ishte shtruar për të disatën herë në një spital të Barcelonës për problemet e gjeneruara nga kanceri në gjendrat limfatike që e kishte goditur që në 2011-ën.
Ish trajneri i Barcelonës ishte operuar për herë të katërt të enjten dhe gjendja e tij shëndetësore mbetej tepër e rëndë.
Shtrimi në spital kishte ndodhur prej pak ditës por lajmi u mbajt sekret, asnjë gazetë spanjole apo katalanase nuk kishte shkruajtur asgjë në respekt të teknikut që fitoi La Ligan e vitit të kaluar. Lajmi gjithsesi i shpëtoi dikujt dhe Twitter bëri pjesën tjetër duke e bërë lajmin publik.
Vilanova ishte 45 vjeç dhe sëmundja iu diagnostikua për herë të parë kur ishte asistenti i Pep Guardiolës në 2011, pas operacionit dhe kurave pati një përmirësim por në dhjetor të 2012-ës erdhi dhe përkeqësimi i gjendjes. Në atë kohë Tito ishte trajneri i Barçës, transmeton Supersport.
Vilanova la stolin, për t’u operuar dhe pastaj shkoi të kurohej në New York duke u kthyer në Barcelonë në fillim të prillit, në kohë për ta udhëhequr skuadrën drejt titullit.
Në 19 korrikun e kaluar bëri të ditur lamtumirën ndaj stolit për shkak të rishfaqjes së sëmundjes ndërsa pak muaj më parë erdhi dhe shfaqja e fundit publike në “Camp Nou” për të parë një ndeshje. Mbrëmjen e së enjtes erdhi dhe lajmi i shtrimit në spital bashkë me raportimin se gjendja ishte vërtet e rëndë dhe më pas për fat të keq dhe ai i vdekjes, Vilanova nuk ia doli të fitonte betejën më të rëndësishme, atë për jetën.