Një vajzë adoleshente ka humbur jetën pasi është sulmuar nga një peshkaqen teksa bënte sërf në brigjet perëndimore të Australisë.
Vajza, 17 vjeçe, u nxor në breg nga i ati dhe u dërgua menjëherë në spital, por nuk mundi të mbijetonte për shkak të plagëve të rënda.
Në momentin e sulmit, në vendin e ngjarjes ndodheshin edhe e ëma dhe dy vëllezërit e vegjël.
Ngjarja ndodhi në Esperance, një vend i njohur për praktikuesit e sërfit. Ky është sulmi i tretë fatal nga një peshkaqen që ndodh në 12 muajt e fundit.
Neville Mansted, një peshkatar profesionist, tha se nuk do të bënte më sërf atje. “Është hera e dytë që shoh diçka të tillë, në të njëjtin vend. Mund të kishte qenë djali im”, tha ai për një gazetë australiane.
Plazhi do të qëndrojë i mbyllur për të paktën 48 orë, derisa autoritetet të kryejnë hetimet.
