Ata që “do t’i tërhiqnin për veshi”, sot ua urojnë Ditën Botërore (FOTO+VIDEO)

Kryetari i VMRO-DPMNE-së, Nikolla Gruevski, romëve sot ua ka uruar Ditën Botërore të tyre, duke theksuar se ai dhe partia e tij e “konsiderojnë kontributin e komunitetit rom në jetën, kulturore, politike dhe ekonomë të shtetit”, shkruan Portalb.mk.

Gruevski, e ka “harruar”, bombën e shtatë të opozitës, të publikuar më 6 mars 2015, në të cilën lideri i LSDM-së Zaev publikoi biseda të përgjuara të funksionarëve të VMRO-DPMNE-së në të cilën, manipulohen dhe ofendohen rëndë romët.

Në bisedën telefonike dëgjohet se si ish ministrja e MPB-së nga radhët e VMRO-DPMNE-së, Gordana Jankulloska kërkon listën e romëve që do t’u jepen ndihma sociale. Në këtë inçizim dëgjohet se si u kanë dhënë paketa me miell romëve për t’i blerë votat e tyre, transmeton Portalb.

Jankulloska në bisedën e saj, thotë që nëse “ciganët” që aludon në romët, do t’i kapin për veshi nëse nuk dalin në votime.

Një ditë pas “bombës” së shtatë, ka reaguar, Ashmet Elezovski nga Forumi Evropian i komunitetit romë në Strasburg i cili është shprehur se ndjehet i nënçmuar pas publikimit të bisedës telefonike ku dëgjohet ministrja e punëve të brendshme, Gordana Jankullovska e cila shprehet se romët e Prilepit do t’i kapë për veshi dhe do t’i nxjerr në zgjedhje e fundit në Maqedoni.

“Si asnjëherë më parë gjendja me të drejtat e komunitetit romë në Maqedoni u kthye mbrapa. Jemi të nënçmuar tej mase nga ofendimet që i dëgjuam nga zyrtarët e lartë të pushtetit si dhe keqpërdorimet dhe shkeljen e të drejtave elementare të romëve”, thuhet ne reagimin e Ashmet Elezovski.

Më 21 mars 2015, në protestën e qytetarëve romë që u zhvillua përpara Qeverisë, janë emituar përgjimet që tregojnë manipulimet zgjedhore në Shuto Orizarë.

“Nuk do të kemi streaming, sepse ne nuk jemi VMRO, ne jemi parti e varfër. Përgjimet do t’i emitojmë me altoparlantë, që të dëgjojë i gjithë populli se çka ndodhur në Shuto Orizarë”, deklaroi Samka Ibraimovski nga Partia për Emancipimin e Romëve.

Dy ditë më pas, më 23 mars 2015, Partia për Emancipimin e Romëve (PER) përsëriti kërkesat për dorëheqjen e ministres së Punëve të Brendshme Gordana Jankullovska dhe për ndriçimin e vjedhjes së votave në Shuto Orizarë, përcjellë Portalb.

Kërkesave të së 21 marsit partia i bashkëngjiti edhe atë për ndalimin e trajtimit diskriminues të romëve në pikat kufitare dhe për ndalesën e udhëtimit në vendet e jashtme.

“PER kërkon dorëheqjen e parevokueshme të ministres së Punëve të Brendshme, Gordana Jankullovska, për përfshirjen e saj të drejtpërdrejtë në procesin zgjedhor në Shuto Orizarë, ku poshtëron romët dhe bën një mori manipulimesh në dëm të PER­-it (provë janë materialet e përgjimit të prezantuara në protestë). Në të kundërt, PER do të organizojë protesta përpara MPB­-së”, thuhet në deklaratën e partisë.