“Në këtë situatë që jemi duhet sa më shpejtë të formohet qeveri politike dhe presidenti Gjorge Ivanov, ta japë mandatin”, tha në një intervistë për “Faktor24”, kryetari i Akademisë së Shkencave dhe Arteve të Maqedonisë (ASHAM), akademiku, Taki Fiti, njofton Portalb.mk.
“Kriza është mjaft serioze, ajo mund ta rrezikojë mbijetesën e shtetit. Bëhet fjalë për krizë të thellë politike dhe shoqërore. Qytetarët gjithnjë e më shumë janë të ndarë dhe kthehet frika te njerëzit. Për ASHAM janë të rëndësishme dy prioritete – zgjidhje të qetë, dialog në institucione dhe sa më shpejtë të formohet qeveria politike”, vlerësoi Taki Fiti.
Sipas njeriut të parë të ASHAM, përgjegjësia për zgjidhjen e krizës është te partitë politike dhe udhëheqësit e tyre dhe shefi i shtetit, ndërkaq dialogu patjetër duhet të bëhet në institucione.
I pyetur nëse Platforma Shqiptare është e pranueshme për ASHMA-në, Taki Fiti thotë se “ASHAM nuk sheh rrezikim të gjuhës maqedonase në të ashtuquajturën Platformë Shqiptare dhe se ASHAM nuk do të pranojë zgjidhje të cilat janë jashtë Kushtetutës”.
