Dhjetëra qytetarë serbë kanë hyrë me dhunë natën e së mërkurës në stacionin e policisë në Zubin Potok, në pjesën veriore të Kosovës, për të liruar një person të paraburgosur gjatë ditës nga autoritetet e rendit.
Ai ishte paraburgosur për prishje të rendit dhe qetësisë publike.
Kryetari i këtij qyteti, Stevan Vulloviq, u ka thënë gazetarëve se “banorët lokalë kanë depërtuar dhe kanë liruar personin e arrestuar Sllobodan Sovrliq”, në kërkim të të cilit thuhet se policia ishte tash e sa kohë.
Në deklaratën për gazetarët, Vulloviq tha se “disa makina të misioni evropian për sundimin e ligjit, EULEX, ishin larguar nga ky qytet”.
Ai e ka përshkruar situatën e mëpastajme si të qetë dhe tha se qytetarët, që e kishin bllokuar stacionin e policisë së Kosovës në Zubin Potok, ishin shpërndarë.
Raportohet se ka pasur dëme materiale. Autoritetet në Kosovë nuk e kanë komentuar rastin, e deri më tash as misioni EULEX.
Reagimi i vetëm vjen nga zyra për Kosovën në qeverinë e Serbisë, e cila përmes një komunikate ka dënuar ndërhyrjen në stacionin e policisë dhe ka tërhequr vërejtjen se “çdo dhunë që shkaktohet nga serbët gjithmonë shfrytëzohet edhe si shkas për të arsyetuar sulmet ndaj tyre dhe pronës së tyre”.