Vajza e madhe e Presidentit Donald Trump është vënë në qendër të sulmeve. Shkak është bërë një fustan me vlerë 5,000 $ që ajo veshi të shtunën në një mbrëmje me bashkëshortin, tani këshilltar në Shtëpinë e Bardhë, Jared Kushner.
Ivanka Trump, e cila ka krijuar pasurinë e saj me anë të biznesit në fushën e modës, e postoi foton ku kishte veshur fustanin e shkëlqyeshëm, ngjyrë argjendi, gjatë natës të së shtunës, kur avokatë dhe protestues po bënin thirrje për lirimin e imigrantëve.
Të paktën 100 prej tyre mbahen nën kontroll dhe mijëra të tjerë janë ndaluar të vijnë në Amerikë, pasi Presidenti Trump nxori një urdhër për ndalimin e imigracionit nga shtatë shtete myslimane për 90 ditë dhe ndaloi përgjithmonë ardhjen e refugjatëve sirianë. Ky vendim shkaktoi menjëherë rrëmujë në aeroportet brenda dhe jashtë Amerikës.
Ivanka Trump dhe Jared Kushner, në Washington, po merrnin pjesë në darkën e përvitshme të Alfalfa Club, një ngjarje pompoze ku marrin pjesë çdo janar agjentët më të fuqishëm të bursës. Por si i ati që theu traditën dhe nuk mori pjesë, ashtu dhe ajo që ishte veshur me një fustan pompoz, u konsiderua si një veprim jashtë kohe nga shumë njerëz të prekur nga ligjet e reja.
Atë e kanë krahasuarme Marie Antoinette-ën për jetën luksoze në një kohë kur situata nuk është aspak e qetë. Disa kanë zgjedhur humor edhe më të hidhur duke e vënë fustanin e saj përballë mbështjellëseve që përdoren për të ngrohur refugjatët sirianë që i ati sapo ndaloi.
Disa madje, të nervozuar, kanë tërhequr bizneset e tyre nga kompanitë që bashkëpunojnë me vajzën e Trump.
Dhe, siç ndodh gjithmonë në internet, ky sulm gjeneroi një sulm tjetër të njerëzve që e mbronin Vajzën e Parë të preferuar.
Disa theksuan që nuk kishte pse ky inat të drejtohej nga Ivanka, kur aktorët e Hollywood-it po vepronin njëlloj në ndarjen e çmimeve Screen Actors’ Guild.