Një prej futbollistëve më të mëdhenj në historinë e futbollit portugez, Luis Figo, iu rikthye edhe një herë një prej momenteve vendimtare të karrierës së tij, vitit 2000 kur vendosi që të kalonte nga Barcelona tek Reali i Madridi.
Një transferim i tillë shokoi tifozët katalanas dhe bëri që Figo të merrte kërcënime të shumta për jetën në muajt e vitet në vazhdim.
Në një intervistë për të përditshmen “Sport”, Figo theksoi se vendosi të bënte atë lëvizje pasi nuk ndihej i vlerësuar në “Camp Nou”, transmeton Supersport.
”Barcelona nuk më trajtoi mirë dhe kjo më inatosi. Edhe pse kaloi kohë, zemërimi mbeti brenda meje, pasi përgjegjësit e klubit nuk më jepnin vlerësimin e duhur. Nga ana tjetër, unë isha lojtari që Florentino Perez dëshironte. Vendosa të pranoja ofertën e Realit kur në një ndeshje më lanë në stol pa më dhënë asnjë shpjegim”, zbuloi Figo.
Në intervistën e tij, gjithsesi Figo refuzoi që të binte në kurthin e krahasimit midis Ronaldos dhe Messit.
“Bëhet fjalë për dy futbollistë të mrekullueshëm. Unë do të doja që t’i kisha të dy në skuadrën time”, tha legjenda Figo.