Një shpërthim i fuqishëm i ndodhur në qendër të uzinës së përpunimit të naftës në Ballsh i mori jetën një punëtori. Një tragjedi që mund të ishte shmangur nëse do të ishin marrë parasysh paralajmërimet e punonjësve për një valvul shkarkimi e cila nuk punonte.
Kryetari i Bashkisë së Mallakastrës, Agron Kapllanaj në një lidhje telefonike për mediat tha se personi që ka humbur jetën është identifikuar, por zgjodhi të mos e thotë emrin në transmetim të drejtpërdrejtë duke thënë se “ishte një miku jonë” për të cilin e pati të vështirë t’i thotë emrin.
Express mëson se viktimë e këtij shpërthimi mbeti 40-vjeçari Sh.Muça nga Ballshi.
Sipas tij, nga bisedat që ka pasur me një prej teknikëve në rafineri, dyshohet që shkak për shpërthimin të jetë bërë valvula që shkarkonte.
“Ka qenë e shkruar në procesverbal 3-4 ditë më parë, ishin njoftuar edhe eprorët, që valvula nuk punonte dhe shkarkonte. Ishte rritur presioni në maksimum dhe në atë moment ka shpërthyer”, – tha ai.
Sipas informacioneve të para nga vendngjarja, valvula dyshohet të ishte e një pompe hidrogjeni.
Kryebashkaiku i Mallakastrës tha se shpërthimi ka qenë mjaft i fuqishëm, dhe se ka ndodhur në repartin numër 3 të uzinës. 
Foto nga shperthimi ne repartin numer 3
Ai tha se njerëzit kanë dalë të djegur dhe të plagosur, ku 6 prej tyre janë dërguar në një gjendje më të rëndë në spital, ndërsa të gjithë punëtorët e tjerë janë evakuuar.
Ai foli edhe për një tjetër problematikë, siç është ajo e mungesës së një ambulance në uzinë.
“Një ambulancë është jashtë pune prej vitesh dhe nuk punon”, – tha ai.
Sipas tij, rreziku tashmë ka kaluar dhe nuk ka rrezikshmëri për shpërthime të tjera pasi forcat zjarrfikëse kanë mundur të vënë nën kontroll flakët e zjarrit.
Në uzinë në turnin e natës mendohet të kenë qenë rreth 100 punëtorë.