DSK jashtë çdo kontrolli, pa llogaridhënie edhe para të zgjedhurve të popullit!

Jo vetëm ndaj Prokurorisë Speciale Publike, por edhe ndaj Kuvendit të Maqedonisë ku janë të zgjedhurit e popullit, Drejtoria e Sigurisë dhe Kundërzbulimit ka qenë hermetikisht e mbyllur. Këtë e vërtetojnë në deklaratat e tyre për Portalb, deputetët dhe kryetari i Komisionit kuvendor për mbikëqyrjen e punës së Drejtorisë për Siguri dhe Kundërzbulim dhe Agjencisë për Kundërzbulim, njofton Portalb.mk.

Deputeti Zylfi Adili, nënkryetar i Partisë Uniteti tha se Komisioni për mbikëqyrjen e shërbimeve pati kontakte me DSK dhe Agjencinë e Inteligjencës, por që të njëjtat nuk kanë qenë korrekt, sidomos kur Adili ka kërkuar përgjegjësi për rastet e ndjeshme që kanë të bëjnë me interesin shqiptar.

“Nuk kanë qenë korrektë në raport me Komisionin kuvendor. Mund të them lirisht se këta institucione e kanë llogaritur veten se mund të vendosin për gjithçka në këtë shtet, duke mos respektuar as Ligj e as Kushtetutë. Ata nuk kanë qenë të sinqertë në raport me ne, sidomos për interesat shqiptare, siç është: rasti i Kumanovës, Sopotit, Monstra dhe raste tjera ku përgjegjës ka qenë sistemi i sigurimit të shtetit. Unë mendoj se nuk ka pasur bashkëpunim të mirë mes Kuvendit, konkretisht Komisionit kuvendor për mbikëqyrjen e shërbimeve dhe DSK-së”, deklaroi për Portalb Adili.

Deputeti i PDSH-së, Ernad Fejzullahu vlerëson se maja e antishqiptarizmës rrjedh nga shërbimet dhe se tentimet që DSK të bashkëpunojë me Kuvendit ka qenë farsë.

“DSK-së i ka shërbyer parlamenti për të dëshmuar se gjëja ka demokraci. Tani, jo që s’i jep llogari parlamentit, por nuk bën hesap askënd, qoftë edhe gjykatat. Aty është bërë dosja edhe e kreut të PDSH-së, diku 2004-2007. Të mos flasim për gjëra tjera. Ata janë një gjenerator i të gjitha të këqijave, aksioneve spektakolare kundër shqiptareve. Unë as s’i kam bërë hesap, sepse konsideroj se maja e antishqiptarizmit është aty. Prej aty kanë nisur të këqijat, e pastaj në forma juridike janë zbatuar”, theksoi për Portalb Fejzullahu.

Hari Llokvenec, nga LSDM, kryetar i Komisionit kuvendor për mbikëqyrjen e punës së Drejtorisë për Siguri dhe Kundërzbulim dhe Agjencisë për Kundërzbulim tregon se DSK vetëm deklarativisht ka premtuar bashkëpunim me Kuvendin.

“Në momentin e parë, kur Komisioni dhe unë si kryetar i kërkuam dokumentet bazë, si parakusht që të mund të bëjmë një inspektim thelbësor, dhe jo vetëm formal, të punës së tyre, ata na refuzuan. Nga Drejtoria kërkuam listën e pajisjes që është siguruar më vitin 2006, listën e porosive më pajisje që Drejtoria i ka bërë deri në fund të vitit 2015 … kërkuam të gjithë procedurat interne, protokollare dhe akte nënligjore që janë udhërrëfyes kryesor se si funksionon Drejtoria. Në asnjërën prej kërkesave nuk morëm përgjigje pozitive”, sqaroi për Portalb Llokvenec.

Mosdhënia e përgjegjësisë nga Sistemi i sigurisë në vend krijon pasiguri te qytetarët. Analistët nuk e përjashtojnë  mundësinë që përgjimi i paligjshëm ende mund të zgjatë.