Ekipe të Prokurorisë Speciale, përveçse në kombinatin energjetik në Manastir, ka shtrirë hetimet edhe në kompaninë shtetërore “ELEM” mëson Alsat M prej burimeve në këtë kompani.
Nga “ELEM” bëjnë të ditur se është vendosur bashkëpunim me shërbimet përkatëse dhe mbeten të hapur për gjithçka që është objekt i interesimit të Prokurorisë Speciale.
Deri tani nga Prokuroria Speciale nuk japin kurrfarë detajesh, as nëse kanë qenë, e as çfarë hetohet. Ata bëjnë të ditur se për disa lëndë është duke u udhëhequr procedurë para-hetimore, por nuk mund të zbulohet asgjë më shumë. Në njërën nga bombat e opozitës, ishte emetuar një bisedë për të cilën thuhej se është zhvilluar mes ish kryeministrit Nikolla Gruevski dhe ish drejtorit të ELEM-it, Vllatko Çingovski, ku bëhej fjalë për kurdisjen e një tenderi për “REK Bitolla”.
Në këtë bisedë, ish kryeministri përmend një makinë “Seat Ibiza” për të aluduar në emrin e biznesmenit të cilit duhet t’i jepet biznesi me thëngjill në kombinatin energjetik në Manastir. Alsat M tentoi të vendos kontakt me Çingovskin, por ai mbeti i pakapshëm për koment.