Nëpunësit policor në Maqedoni, në një automjet transportues të llojit “Iveko” me targa regjistrimi nga Shkupi kanë gjetur 47 persona – migrantë nga Siria, Iraku, Pakistani dhe Afganistani, raporton Anadolu Agency (AA).
Në njoftimin e Ministrisë së Punëve të Brendshme (MPB) thuhet se në autostradën Udovë-Negotinë, tek tunelet afër Demir Kapisë, dje rreth orës 07:30 policia zbuloi migrantët.
Siç thuhet në njoftimin e MPB-së, nëpunësit policorë dhanë shenjë për ndalimin e automjetit “Golf” me targa regjistrimi nga Shkupi dhe automjetit transportues “Iveko”, të cilët nuk u ndalën.
Makina u drejtua drejt Demir Kapisë, ndërsa automjeti transportues vazhdoi të lëvizë dhe në rreth 500 metra pas kryqëzimit u ndal, ndërsa shoferi doli dhe u arratis. Pas një kohe të shkurtër, thuhet në njoftim, shoferi u arrestua nga nëpunësit policor, me ç’rast u vërtetua se bëhet fjalë për personin N.S (38) nga Republika e Serbisë.
“Pas kontrollit të kryer të automjetit janë gjetur 47 persona-migrantë nga Siria, Iraku, Pakistani dhe Afganistani. Personi N.S së bashku me migrantët janë arrestuar dhe mbajtur në stacionin policor Negotinë për procedurë të mëtutjeshme. Nga ana e gjykatësit të procedurës paraprake shtetasit serb i është shqiptuar masa e paraburgimit në kohëzgjatje prej 30 ditësh. Autoritetet ngritën kallëzim penal kundër personit N.S për shkak të ekzistimit të dyshimit themelor për kryerje të veprës penale “trafikim migrantësh”, njoftoi MPB-ja.