Nga Belgjika, Gent
Hajrush Mani
Ekspedita ‘kuqezi’ të martën pasdite ka udhëtuar drejt Belgjikës, ku të enjten do të zhvillojë ndeshjen e parë të play-offit për kualifikim në grupet e Liga Evropës kundër Gentit.
Shkëndija tani më gjendet në Gent të Belgjikës, ku të enjten do të luajë takimin e parë të play-offit të Liga Evropës. Ekipi të martën pasdite me fluturim çarter udhëtoi për në Belgjikë dhe në orët e mbrëmjes u vendos në hotelin ‘Holiday Inn Express’.
Të përkujtojmë se Shkëndija është ekipi i vetëm nga Maqedonia që këtë vit mbijetoi më shumë se një raund në Evropë, duke arritur të shkruajë historinë me eliminimin e ekipeve me renome si Krakovia e Polonisë, Neftchi i Azerbajxhanit dhe Mllada Boleslav nga Republika Çeke. Tani Shkëndija para vetes ka sprovën më të vështirë, pasi Genti është favorit i madh, skuadër nën-kampione e Belgjikës dhe pjesëmarrëse në 1/8 e finales së Ligës së Kampionëve sezonin e kaluar.
Sonte në orën 20:10 në konferencën zyrtare do të paraqiten trajneri Bruno Akrapoviq dhe kapiteni Ferhan Hasani, ndërsa nga ora 20:30 ekipi do të zhvillojë seancën e fundit stërvitore në stadiumin ‘Ghelamco Arena’.
Përballja Gent-Shkëndija luhet të enjten me fillim në orën 20:30. /Portalb.mk/