‘Revolucioni i Larmë’ vjen me protesta masive në Shkup?
Organizatorët që thirrën këta njerëz për më se tre muaj që të dalin në rrugë, nuk janë të kënaqur me marrëveshjen që arritën katër partitë në Klubin e Deputetëve të mërkurën në Shkup. Tani lëvizja “Protestoj” po thotë se do të mbush edhe më shumë rrugët e kryeqytetit me njerëz, sepse kërkesat e tyre nuk janë marr parasysh, në zgjidhjen që pajtuan katër partitë për ta nxjerr vendin nga kriza politike, njofton TV21.
“Revolucioni i larmë” do të riaktivizohet së shpejti për të protestuar, paralajmëron Pavle Bogojevski përfaqësuesi i lëvizjes “Protestoj”, sepse sipas tij, zgjedhjet nuk e nxjerrin shtetin nga kriza.
Madje, siç thotë ai, kauza e demonstruesve nuk u mor parasysh nga politika.
“Nuk janë çështje që duhej të ishin në tavolinën e bisedimeve vetëm ndërmjet katër parive, ato çështje duhet të kenë legjitimitet më të gjerë publik dhe konsensus. Mirëpo, një gjë e tillë nuk mund të pritet deri sa VMRO dhe BDI janë në pushtet. Dhe kuptohet që protestat, si formë e shprehjes së revoltës, asnjëherë nuk do të ndërpritet”, tha ai.
“Revolucioni të Larmë”, ka parashtruar tetë kërkesa prej se ka ftuar njerëzit që të dalin të protestojnë në rrugët e Shkupit.
Marrëveshja e së mërkurës përmbledh katër nga këto çështje.
Në rrjetet sociale kanë filluar të qarkullojnë afishe ku renditen kërkesa e pa përmbushura nga skena politike, dhe kjo po shërben si paralajmërim për vazhdim të protestave.
“KËRKESAT E PAPLOTËSUARA TË REVOLUCIONIT TË LARMË”
1) DORËHEQJE TË MENJËHERSHME DHE TË PAREVOKUESHME TË GJORGJE IVANOVIT NGA FUNKSIONI I PRESIDENTIT TË REPUBLIKËS SË MAQEDONISË;
2) FORMIMI I DHOMAVE SPECIALE NË GJYKATËN PENALE, TË CILAT DO TË JENË PËRGJEGJËSE PËR RASTET QË JANË AKTUALISHT NËN JURIDIKSIONIN E PROKURORISË PUBLIKE SPECIALE;
3) PËRFSHIRJA E DETYRUESHME E PJESËTARËVE TË PAVARUR NGA SHOQËRIA CIVILE NË PROCESIN E ZGJIDHJES SË KRIZËS.
4) FORMIMI I NJË QEVERIE KALIMTARE, E CILA DERI NË FUND DO TË ZBATOJ REFORMAT PRIORITARE TË DALA NGA RAPORTI I PRIBESË.
Pavle Bogojevski, thotë se themelimi i të ashtuquajturës “Gjykatë Speciale” do të jetë pika më e nxehtë.
Në bazë të marrëveshjes së re, edhe nëse Gjykata Kushtetuese e gjen si jo-kushtetuese themelimin e Prokurorisë Publike Speciale, brenda pesë ditëve, katër partitë duhet të ndryshojnë ligjin për të rivënë në funksion Prokurorinë Speciale.
Sipas Protestoj, përderisa këto kërkesa nuk përmbushen, protestat nuk ndalen.
