Nga sot në Parlamentin e Malit të Zi, deputetët shqiptarë do të mund që fjalimet e tyre ti mbajnë edhe në gjuhën shqipe, ka njoftuar kryetari i shtëpisë ligjvënëse Darko Pajoviç.
Një mundësi të tillë më herët e paralajmëroi kreu i Parlamentit të Shqipërisë Ilir Meta, i cili një javë më herët qëndroi për vizitë zyrtare në Podgoricë.
Atëherë, fjalimin e mbajti në shqip, ndërkohë që Pajoviç për vendimin e fundit tha se është një pilot projekt.
“Nga sot përmes një pilot projekti në Parlamentin e Malit të Zi mundësohet që deputetët të mbajnë fjalimet edhe në gjuhën shqipe, dhe kjo është arsyeja përse keni kufje para vetes”, u tha Pajoviç deputetëve.
Deputeti i Frontit Demokratik, Sllaven Radunoviç, përshëndeti një veprim të tillë për të pyetur se cilën gjuhë do ta dëgjojnë qytetarët të cilët ndjekin seancat përmes televizionit.
“A do të flasin shqip për veten e tyre ndërsa qytetarët shqiptarë këtë të mos mund ta dëgjojnë në shqip? A bëhet fjalë për një truk marketingu ose qytetarët shqiptarë do të mund të dëgjojnë fjalimet e deputetëve të tyre në shqip?, pyeti Radunoviç.
“Nga Parlamenti do të dalin dy sinjale. Do të varet nga transmetuesi se cilën gjuhë do ta përdorë. Pra, u është mundësuar televizioneve lokale dhe atyre me licencë kombëtare”. Po orvatemi që atyre që jetojnë në mjedise ku flitet gjuhë tjetër nga ajo e Malit të Zi të mund të dëgjojnë edhe në shqip”, tha Pajoviç.
Partitë shqiptare në Mal të Zi kanë dy deputetë.