Hetuesit francezë tani për tani nuk mund të dëshmojnë se shoferi i kamionit, Mohamed Lahouiej Bouhlel i cili javën e kaluar vrau të paktën 84 persona në Nicë, kishte të bëjë me një rrjet terrorist, njoftoi sot ministri i Punëve të Brendshme të Francës, Bernard Cazeneuve, raporton Anadolu Agency (AA).
Organizata terroriste DAESH mori përgjegjësinë për sulmin që ndodhi të enjten, por mbeti e paqartë nëse sulmuesi ka pasur lidhje të veçantë me grupin. Cazeneuve tha se sulmuesi mund të ketë qenë i motivuar nga interesat e pjesëtarëve të DAESH-it por që nuk ka bashkëpunuar me rrjetin.
“Një lidhje e tillë ende nuk është vërtetuar nga hetimet”, tha Cazeneueve në deklaratën për Radion RTL.
Autoritetet më parë deklaruan se Muhammed Lahouaiej Bouhlel, tuniziani i cili prej vitesh jeton në Nicë shumë shpejt është radikalizuar.
Në sulmin terrorist në Nicë, qytet në jug të Francës, u vranë të paktën 84 persona, përfshirë edhe fëmijë ndërsa 308 të tjerë u plagosën. Cazeneueve tha se 59 persona ende janë në spital, 29 prej të cilëve në kujdes intensiv.