Dështimi i partisë së Behgjet Pacollit, AKR-së për të kaluar pragun zgjedhor në zgjedhjet e fundit parlamentare, bëri që shumë drejtues të kësaj partie të dorëhiqen.
Fadil Ismajli nënkryetar dhe Dardan Gashi zv/president i AKR-së ishin të parët që u larguan nga partia e Pacollit, përcjell ORAinfo.
Së fundmi largimin nga AKR-ja e ka paralajmëruar edhe personi i dytë në këtë parti, Mimoza Kusari-Lila.
Ajo në një intervistë për mediat elektronike ka thënë se më nuk do të garojë për asnjë post nën ombrellën e partisë së Pacollit.
Sipas saj, këtë po e bën për shkak të parimeve dhe menaxhimit të brendshëm të partisë.
“Përcaktimi im politik lidhet me nivelin qendror e jo me nivelin lokal”, ka thënë ajo.
Largimi i figurave kyçe të AKR-së lë të kuptohet se kjo parti do të këtë shumë vështirë rimëkëmbjen ashtu siç po deklaron lideri i AKR-s Pacolli.
Madje ky i fundit ditë me parë është zotuar në fuqizimin e partisë së tij, duke shpresuar se në zgjedhjet e ardhshme AKR-ja do t’i fitojë te paktën 20 për qind të votave. Sidoqoftë, AKR-ja për dy mandate ka qenë në pushtet, por pavarësisht zotimeve për ndryshime, ato kanë mbetur vetëm fjalë në ajër.