Eshtë momenti kur të gjithë flasin për Topin e Artë. Tre finalistët tashmë janë përcaktuar, janë Cristiano Ronaldo i Realit të Madridit, Franck Ribery i Bayernit e Lionel Messi i Barcelonës, që kërkon të pestin radhazi.
Edhe polaku i Borussia Dortmund, Robert Lewandowski, një nga sulmuesit më të mirët në botë për momentin, nuk mund t’i evitojë komentet për Topin e Artë, teksa pyetet nga një e përditshme sportive e vendit të tij.
“Nëse do të ishte në dorën time, Topin e Artë do t’ia kisha dhënë Franck Ribery. Mendoj se është futbollisti që e meriton më shumë këtë vit”.
Më tej Lewandowski pyetet se cfarë mendon për Cristiano Ronaldon dhe a nuk është portugezi i Realit, kandidati më potencial për trofeun individual.
“Cristiano po kalon një vit realisht impresionues, duke shënuar shumë gola, me statistika mbresëlënëse e rekorde të reja. Megjithatë, edhe pse nuk ka fituar tituj me Realin, Ronaldo mbetet një kandidat i fortë për Topin e Artë”.
Nisur nga zërat se Lewandowski mund ta ketë të mbyllur kalimin te Bayerni në fund të sezonit, preferencat e tij ndoshta mund të jenë të ndikuara nga e ardhmja me bavarezët. I bindur se është Ribery ai që e mertion Topin e Artë, bomberi i Dortmundit nënvizoi se francezi ka impresionuar jo vetëm në sulm, por edhe në mbrojtje, është spektakolar dhe mbi të gjitha ka fituar gjithçka me Bayernin.