Gazetari Vehbi Kajtazi ka denoncuar në Polici kërcënimin që ai pretendon t’ia ketë bërë, një ditë më parë, kryeministri i vendit, Isa Mustafa.
Gazetari që të dielën thotë të jetë fyer e kërcënuar përmes telefoni nga Kryeministri Isa Mustafa, ka deponuar rastin në Polici. Këtë e ka bërë të ditur vet, gazetari Vehbi Kajtazi përmes një postimi në “Facebook”.
“Sapo kam denoncuar në Polici, kryeministrin e Kosovës, z. Isa Mustafa për kërcënim ndaj meje. Rastin janë duke e hetuar hetuesit e krimeve të rënda në Policinë e Kosovës”, ka shkruar ai, përcjell Gazeta Express.
“Pres prej Policisë, Prokurorisë dhe Gjykatës që të veprojë me të njëjtat standarde sikur në rastin e Alban Morinës, i cili ishte arrestuar, akuzuar, gjykuar e denuar brenda dy ditësh për shkak të një kërcënimi në Facebook që i kishte bërë djalit të kryeministrit, Besnik Mustafës dhe ministrit Arban Abrashi”, thotë në postimin e tij Vehbi Kajtazi.
Gazetari Kajtazi ka raportuar se kërcënimi direkt nga Kryeministri Mustafa erdhi pas publikimit të një hulumtimi të tij në Portalin ku është bashkëthemelues, “Insajderi.com”, se vëllai i Kryeministri kishte migruar ilegalisht në Gjermani përmes valles së ‘ikjeve masive’ që u shkaktua dimrin e kaluar, pak muaj pasi Isa Mustafa ishte vënë në krye të ekzekutivit.
Edhe vet kryeministri Mustafa, me tu publikuar artikulli e kishte pranuar këtë gjë, dhe kishte thënë se arsyeja e ikjes së vëllait të tij nga Kosova kanë qenë të lidhura me gjendjen e tij shëndetësore, dhe kishte kërkuar shërim në Gjermani.